ଶ୍ରୀକାନ୍ତଙ୍କ ମାନଭଞ୍ଜନ କଲେ ନିରଞ୍ଜନ !

ଭୁବନେଶ୍ୱର, ୧/୬( ସକାଳଖବର) : ନିରଞ୍ଜନ ପଟ୍ଟନାୟକ ପିସିସି ସଭାପତି ହେବାର ଦିନ କେଇଟା ପରେ ଛୋଟିଆ ବିସ୍ଫୋରଣଟେ କରିଥିଲେ ବରିଷ୍ଠ କଂଗ୍ରେସ ନେତା ଶ୍ରୀକାନ୍ତ ଜେନା । ତେବେ ଶ୍ରୀକାନ୍ତଙ୍କ ଏହି ବିସ୍ଫୋରଣରେ ଆଉ କିଏ ଆହତ ହୋଇଥିଲେ କି ନହୋଇଥିଲେ ତାହା ତ ଅଲଗା କଥା, କିନ୍ତୁ ବିସ୍ଫୋରଣର ବାକ୍ ଛିଟାରେ ନିଜେ ଶ୍ରୀକାନ୍ତ ଆହତ ହୋଇଥିଲେ । ତୃଣମୂଳ କଂଗ୍ରେସ କର୍ମୀଙ୍କ ଠାରୁ ନେଇ ରାଜ୍ୟସ୍ତରୀୟ ନେତା ପ୍ରତ୍ୟକ୍ଷ ଓ ପରୋକ୍ଷ ଭାବେ ଶ୍ରୀକାନ୍ତଙ୍କ ଉପରେ ବର୍ଷିଥିଲେ । ଖାଲି ସେତିକି ନୁହେଁ, ଏଆଇସିସି ନେତାମାନେ ମଧ୍ୟ ଶ୍ରୀକାନ୍ତ ଜେନାଙ୍କ ମନ୍ତବ୍ୟ ଉପରେ ବିରକ୍ତି ପ୍ରକାଶ କରିଥିଲେ । ଏପରିକି କାର୍ଯ୍ୟାନୁଷ୍ଠାନର ସମ୍ମୁଖୀନ ହେବା ନେଇ ମଧ୍ୟ କଂଗ୍ରେସ ଅଳିନ୍ଦରେ ଚର୍ଚ୍ଚା ହେଉଥିଲା । ଶ୍ରୀକାନ୍ତଙ୍କ ଚିଠି ନିରଞ୍ଜନଙ୍କ ଉଦେ୍ଧଶ୍ୟରେ ଥିଲେ ମଧ୍ୟ ନିରଞ୍ଜନ ତାହାକୁ ଗୁରୁତର ସହ ଗ୍ରହଣ କରିନଥିବା ଜାଣିବାକୁ ମିଳିଛି । ସମସ୍ତଙ୍କୁ ସାଙ୍ଗରେ ନେଇ କଂଗ୍ରେସକୁ ମଜବୁତ କରିବା ପାଇଁ ସଂକଳ୍ପ ନେଇଥିବା ନିରଞ୍ଜନ ପଟ୍ଟନାୟକ ଶ୍ରୀକାନ୍ତଙ୍କ ମାନଭଞ୍ଜନ କରିବା ପାଇଁ ଉଦ୍ୟମ କରିଛନ୍ତି । ଅବଶ୍ୟ ଖୋଲାଖୋଲି ଭାବେ ନୁହେଁ । ଶ୍ରୀକାନ୍ତଙ୍କୁ ଗୋପନରେ ସାକ୍ଷାତ କରି ମନେଇବାକୁ ନିରଞ୍ଜନ ଉଦ୍ୟମ କରିଥିବା କଂଗ୍ରେସ ଅଳିନ୍ଦରେ ଚର୍ଚ୍ଚା ହେଉଛି । ଗଲା ମଙ୍ଗଳବାର ରାତିରେ ଶ୍ରୀକାନ୍ତଙ୍କ ବାସଭବନକୁ ଯାଇଥିଲେ ନିରଞ୍ଜନ । ଉଭୟ ନେତା ବେଶ୍ କିଛି ସମୟ ଧରି ଆଲୋଚନା କରିଥିଲେ । କିନ୍ତୁ ଆଲୋଚନାର ନିଷ୍କର୍ସ କ’ଣ ଥିଲା ତାହା କିନ୍ତୁ ସ୍ପଷ୍ଟ ହୋଇନାହିଁ । ଆସନ୍ତା ସପ୍ତାହରେ ରାହୁଲଙ୍କୁ ଭେଟିବେ ନିରଞ୍ଜନଙ୍କ ଟିମ୍ । ପିସିସି ଟିମ୍ ଓ ଜିଲ୍ଲା ସଭାପତିଙ୍କ ନାମ ମଧ୍ୟ ଘୋଷଣା କରାଯିବାର ସମ୍ଭାବନା ରହିଛି । ତେଣୁ ପିସିସି ପୁନର୍ଗଠନ ନେଇ ମଧ୍ୟ ଉଭୟଙ୍କ ମଧ୍ୟରେ ଆଲୋଚନା ହୋଇଥିବା ଜାଣିବାକୁ ମିଳିଛି ।