ବିଦେଶୀ ପକ୍ଷୀଙ୍କ କଳରବରେ କମ୍ପୁଛି ସାତପଡ଼ା

ପୁରୀ, ୧୨/୧୨(ସକାଳଖବର): ଶୀତଋତୁର ଆଗମନ ହେବାରୁ ବିଦେଶାଗତ ପକ୍ଷୀ ଚିଲିକା ଓ ସାତପଡା ନିକଟରେ ବହୁ ସଂଖ୍ୟାରେ ଆସି ପହଂଚିବାରେ ଲାଗିଛନ୍ତି । ବିଭିନ୍ନ ରଙ୍ଗ ବେରଙ୍ଗର ପକ୍ଷୀମାନେ ଦଳ ଦଳ ହୋଇ ଉଡୁଥିବା ସମୟରେ ଅତି ଆକର୍ଷଣୀୟ ଦେଖାଯାଉଛି ବୋଲି ଅଂଚଳବାସୀ ମତ ଦେଇଛନ୍ତି । ବିଦେଶୀ ପକ୍ଷୀଙ୍କ ତିନି ମାସର ଘର ଭାବେ ଚିଲିକା ଅଂଚଳ ପରିଚିତ । ପକ୍ଷୀତୀର୍ଥ ନଳବଣ ଏବେ କୋଳାହଳ ମୟ । ବନବିଭାଗ ଓ ସିଡିଏ ପକ୍ଷରୁ ପକ୍ଷୀ ଶିକାର ନକରିବା ପାଇଁ ସଚେତନତା ସୃଷ୍ଟି କରାଯାଇଛି । ବିଦେଶୀ ପକ୍ଷୀଙ୍କୁ ଅତିଥିଭାବେ ବିବେଚନା ପୂର୍ବକ ସେମାନଙ୍କ ପ୍ରତି ନିଷ୍ଠୁରତା ପ୍ରଦର୍ଶନ ନକରିବା ପାଇଁ ପକ୍ଷୀପ୍ରେମୀ ବ୍ରହ୍ମଗିରି ଅଂଚଳର ଯୁବ ସମାଜସେବୀ ରମାଶଙ୍କର ପାତ୍ର ମତ ଦେଇଛନ୍ତି । ଫରେଷ୍ଟ ରେଞ୍ଜ ପକ୍ଷରୁ ୨୪ଘଂଟିଆ ପ୍ରହରା ବ୍ୟବସ୍ଥା କରାଯାଇଛି । ଅଷ୍ଟ୍ରେଲିଆ, କାନାଡ଼ା, ଫିଲିପାଇନ୍ସି, ଉଜବେକିସ୍ଥାନ, ମଙ୍ଗୋଲିଆ ଆଦି ଅଂଚଳରୁ ପକ୍ଷୀ ଆସୁଥିବା ଦେଖିବାକୁ ମିଳିଛି ।