ବାଘୁଣୀକୁ ନେଇ ଆଶା ଆଶଙ୍କା

ଅନୁଗୋଳ ,୨୬/୮ (ସକାଳଖବର) ବାଘୁଣୀ ସୁନ୍ଦରୀକୁ ନେଇ ସାତକୋଶିଆ ଅଭୟାରଣ୍ୟ ଅଞ୍ଚଳରେ ସୃଷ୍ଟି ହୋଇଛି କୋକୁଆ ଭୟ । ବାଘୁଣୀ ସୁନ୍ଦରୀ କିଛି ଗାାଁରେ ପ୍ରବେଶ କରିବା ଓ ଜଣେ ୱାଚରକୁ ଆକ୍ରମଣ କରିବା ଏହି ଘଟଣାକୁ ନେଇ ଅଞ୍ଚଳବାସୀ ଆତଙ୍କିତ ହୋଇପଡ଼ିଥିବା ବେଳେ ଗାଁକୁ ସୁରକ୍ଷା ଦେବା ନେଇ ଦିନ ରାତି ଠେଙ୍ଗା ବାଡ଼ି ଧରି ଜଗୁଛନ୍ତି । ସ୍କୁଲକୁ ଭୟରେ ଯାଉପାରୁନାହାନ୍ତି ଛାତ୍ରଛାତ୍ରୀ । ଗାଇ, ଛେଳି ଚରାଇ ନେବାକୁ ମଧ୍ୟ ଲୋକମାନେ ଭୟ କରୁଛନ୍ତି । ଆଉ କିଛି ଲୋକ ଘର ତାଲା ପକାଇ ପଳାଇ ଯାଉଥିବା ଜଣାଯାଇଛି ।ଚାଷ ମୂଲ ମଜୁରୀ କରି ଜୀବିକା ନିର୍ବାହ କରୁଥିବା ଲୋକମାନେ କାମଧନ୍ଦାକୁ ଯାଇପାରୁନଥିବାବେଳେ ଅନେକଙ୍କର ରୋଷେଇ ମଧ୍ୟ ବନ୍ଦ ହୋଇଯାଇଛି । ଯାହାକି ଅତି ଦୟନୀୟ ଅବସ୍ଥାରେ ଜୀବନ କାଟୁଛନ୍ତି ଏହି କଟରଙ୍ଗ ଗାଁର ଲୋକମାନେ । କେବଳ କଟରଙ୍ଗ ଗାଁ ଲୋକ ଛାନିଆ ତାହା ନୁହେଁ ସାତକୋଶିଆ ଅଭୟାରଣ୍ୟକୁ ଲାଗିଥିବା କଟକ ଜିଲା ଜିଲିଣ୍ଡା ରେଞ୍ଜ ଅନ୍ତର୍ଗତ କୁଶଖଳି ଓ ସତ୍ୟଜୟପୁର ଗାଁର ଅବସ୍ଥା ମଧ୍ୟ ସମାନ । ଏହି ବାଘ ଛାଡ଼ିବା ଘଟଣାକୁ ନେଇ ସ୍ଥାନୀୟ ଲୋକମାନେ ଜିଲାପାଳଙ୍କ ଅଫିସ ଘେରାଉ କରିଥିଲେ । ସେ ଦିନ ଠାରୁ ବନ ବିଭାଗ ଓ ଅଞ୍ଚଳବାସୀଙ୍କ ମଧ୍ୟରେ ଭିତରେ ଭିତରେ ଚାପା ଉତ୍ତେଜନା ଲାଗି ରହିଛି । କିଛିଦିନ ପୂର୍ବରୁ କଟରଙ୍ଗାକୁ ବାଘୁଣୀ ଆସିଥିବା ଗାଁ ଲୋକ ଜାଣିବା ପରେ ଖବର ପାଇ ବନ ବିଭାଗ ଅଧିକାରୀ ଓ କର୍ମଚାରୀ ଗାଁକୁ ଯାଇଥିଲେ । ଉତ୍ତେଜିତ ଲୋକମାନେ ବନ ଅଧିକାରୀ ଓ କର୍ମଚାରୀମାନଙ୍କୁ ଅଟକ ରଖୁଥିଲେ । ଯାହାକି ବନ ବିଭାଗ ଓ ସାତକୋଶିଆବାସୀଙ୍କ ମଧ୍ୟରେ ଲାଗି ରହିଛି ତୀବ୍ର ଅସନ୍ତୋଷ । ଏଭଳି ଘଟଣା ନେଇ ବନ ବିଭାଗ ଯେଉଁ ୬ଟି ବାଘ ଛାଡ଼ିବ ବୋଲି ଯୋଜନା କରିଥିଲା ତାହା ଫଳପ୍ରଦ ହୋଇପାରିବ ନାହିଁ ବୋଲି ସନେ୍ଦହ ପ୍ରକଟ ହୋଇଛି । ଅପରପକ୍ଷେ ଏହି ଘଟଣାକୁ ନେଇ ଅଞ୍ଚଳବାସୀ ରାଷ୍ଟ୍ରପତି, ରାଜ୍ୟପାଳ, ମାନବାଧିକାର କମିଶନ ସୁପ୍ରିମକୋର୍ଟଙ୍କ ନିକଟରେ ଫେରାଦ ହବା ପାଇଁ ସଜବାଜ ହେଉଥିବା ବିଶେଷ ସୂତ୍ରରୁ ଜଣାଯାଇଛି । ଅନ୍ୟପକ୍ଷରେ ବାଘର ଗତିବିଧିକୁ ନେଇ ବନ ବିଭାଗ ହରଡ଼ହଣାରେ ପଡ଼ିଥିବାବେଳେ ଏକ ୧୮ ଜଣିଆ ଟିମ ବାଘୁଣୀ ଉପରେ ୨୪ ଘଣ୍ଟିଆ ନଜର ରଖାଯାଇଛି ବୋଲି ବନ ବିଭାଗ ସୂତ୍ରରୁ ଜଣାପଡ଼ିଛି । ସୂଚନା ଯେ, ବନ ବିଭାଗ ୨ଟି ବାଘ ସାତକୋଶିଆରେ ଛାଡ଼ିବା ପରଠାରୁ ଚିନ୍ତା ଗ୍ରସ୍ତ ହୋଇପଡ଼ୁଥିବାବେଳେ ଅଞ୍ଚଳବାସୀ ଭୟ ଓ ଆତଙ୍କିତ ଅବସ୍ଥାରେ ରହିଥିବା ଜଣାଯାଇଛି ।