ଶନିବାର ଖୋଲା ରହିବ ଶ୍ରୀମନ୍ଦିର

ପୁରୀ: ଏଣିକି ଶନିବାର ଦିନ ଶ୍ରୀମନ୍ଦିର ଖୋଲା ରହିବ । ଅନ୍ୟ ଦିନ ଭଳି ଶନିବାର ମଧ୍ୟ ଶ୍ରଦ୍ଧାଳୁ ଜଗା ଦର୍ଶନ କରିପାରିବେ । ସମସ୍ତ ପ୍ରକାର କୋଭିଡ ନିୟମକୁ ଅନୁପାଳନ କରିବା ସହ ଦୁଇଟି ଡୋଜ ଟିକା ନେଇଥିବା ବ୍ୟକ୍ତିଙ୍କୁ ମନ୍ଦିର ପ୍ରବେଶ ପାଇଁ ଅନୁମତି ମିଳିବ । ଦୀର୍ଘଦିନ ଧରି କରୋନା ମହାମାରୀ ଯୋଗୁଁ ମନ୍ଦିର ବନ୍ଦ ରହିଥିଲା । ଗତ କିଛିଦିନ ହେବ ସମସ୍ତ କୋଭିଡ ଗାଇଡଲାଇନ୍ସକୁ ଦୃଷ୍ଟିରେ ରଖି ଶ୍ରୀମନ୍ଦର ଖୋଲା ଯାଇଥିଲା । ତେବେ କରୋନା ସଂକ୍ରମଣ ହାର ଦିନକୁ ଦିନ ହ୍ରାସ ପାଉଥିବାରୁ ଜଗାଦର୍ଶନ ପାଇଁ କଟକଣା କୋହଳ କରାଯାଇଛି । ପୂର୍ବ ନିୟମ ଅନୁଯାୟୀ ଶନିବାର ଓ ରବିବାର ସପ୍ତାହନ୍ତ ସଟ୍ଡାଉନ ଥିବାରୁ ଶ୍ରଦ୍ଧାଳୁଙ୍କ ପାଇଁ ମନ୍ଦିର ଦର୍ଶନ ବନ୍ଦ ଥିଲା । ଏହି ସପ୍ତାହନ୍ତ ସଟଡାଉନ ଉଠିଯିବାରୁ ଏଥର ଶନିବାର ଭକ୍ତମାନଙ୍କୁ ଶ୍ରୀମନ୍ଦିରରେ ଭଗବାନଙ୍କୁ ଦର୍ଶନ କରିବାକୁ ଅନୁମତି ମିଳିଛି । କେବଳ ରବିବାର ସାନିଟାଇଜିଂ ପାଇଁ ମନ୍ଦିର ବନ୍ଦ ରହିବ ବୋଲି ଏସଓପି ବୈଠକରେ ନିଷ୍ପତ୍ତି ହୋଇଛି । ଏହା ସହିତ ଦର୍ଶନ ଅବଧିକୁ ଦୁଇ ଘଣ୍ଟା ବଢାଇ ଦିଆଯାଇଛି, ଅର୍ଥାତ ଏଥର ଭକ୍ତମାନେ ସକାଳ ୭ରୁ ରାତି ୯ଟା ପର୍ଯ୍ୟନ୍ତ ଭଗବାନଙ୍କୁ ଦର୍ଶନ କରିପାରିବେ ବୋଲି ସୂଚନା ମିଳିଛି।