ଭାଙ୍ଗିବ କି ନିକ୍-ପ୍ରିୟଙ୍କା ଯୋଡି, କମେଣ୍ଟ କରି ସତ ଜଣାଇଲେ ଅଭିନେତ୍ରୀ

ନୂଆଦିଲ୍ଲୀ ୨୩/୧୧: ପ୍ରିୟଙ୍କା ଚୋପ୍ରା ତାଙ୍କ ସୋସିଆଲ ମିଡିଆ ଆକାଉଣ୍ଟରୁ ସ୍ୱାମୀଙ୍କ ସରନେମ୍ ହଟାଇ ଦେଇଛନ୍ତି । ସେ ‘ଜୋନାସ୍’ ସରନେମ୍ ସହିତ ‘ଚୋପ୍ରା’ କୁ ମଧ୍ୟ ହଟାଇଦେଇଛନ୍ତି। ଯାହାପରେ ବିଭିନ୍ନ ଆଲୋଚନା ହେଉଛି ଯେ ପ୍ରିୟଙ୍କା ନିକ ଜୋନାସଙ୍କଠାରୁ ଛାଡପତ୍ର ନେଉଛନ୍ତି। କିନ୍ତୁ ଏହା ମଧ୍ୟରେ ପ୍ରିୟଙ୍କାଙ୍କ ଗୋଟିଏ କମେଣ୍ଟ ସମସ୍ତଙ୍କ ମୁହଁ ବନ୍ଦ କରିଦେଇଛି। ସୂଚନାନୁସାରେ, ନିକ ଜୋନାସ କିଛି ଘଣ୍ଟା ପୂର୍ବରୁ ଇନଷ୍ଟାଗ୍ରାମରେ ତାଙ୍କ ୱାର୍କଆଉଟର ଏକ ଭିଡିଓ ସେୟାର କରିଛନ୍ତି। ଏଥିରେ ନିକ କଠିନ ପରିଶ୍ରମ କରୁଥିବା ଦେଖିବାକୁ ମିଳିଛି। ନିକଙ୍କ ଏହି ପୋଷ୍ଟରେ ପ୍ରିୟଙ୍କା ଏକ କମେଣ୍ଟ ଦେଇଛନ୍ତି ଯାହା ଛାଡପତ୍ରର ଗୁଜବକୁ ଖଣ୍ଡନ କରିଛି। ଅଭିନେତ୍ରୀ କମେଣ୍ଟରେ ଲେଖିଛନ୍ତି, ‘ଡ୍ୟାମ୍! ମୁଁ ତୁମ କୋଳରେ ମରିବାକୁ ଚାହୁଁଛି।’ ଏହା ସହିତ ସେ ଆଖିରେ ପ୍ରେମ ଏବଂ ହାର୍ଟ ଇମୋଜି ଦେଇଛନ୍ତି। ପ୍ରିୟଙ୍କାଙ୍କ ଏହି କମେଣ୍ଟ ଲୋକଙ୍କ ସମସ୍ତ କଳ୍ପନା ଜଳ୍ପନା ବନ୍ଦ କରିଦେଇଛି। ଏହାପୂର୍ବରୁ, ଅଭିନେତ୍ରୀଙ୍କ ମା ମଧୁ ଚୋପ୍ରା ପ୍ରିୟଙ୍କା-ନିକଙ୍କ ଛାଡପତ୍ର ଉପରେ ପ୍ରତିକ୍ରିୟା ଦେଇଛନ୍ତି। ସେ ସୋସିଆଲ ମିଡିଆରେ ଝିଅ ପ୍ରିୟଙ୍କା ଚୋପ୍ରା ଏବଂ ନିକଙ୍କ ବିବାହରେ ଚାଲିଥିବା ଅସୁବିଧାର ଗୁଜବ ବିଷୟରେ କହିଛନ୍ତି, ‘ଏହା ସବୁ ବେକାର କଥା, ଗୁଜବ ପ୍ରଚାର କର ନାହିଁ।’