ପ୍ରଭାତଙ୍କୁ ଭେଟିଲେ ମୋକିମ୍, ଫେରିଗଲେ ନିରଞ୍ଜନ

କଟକ, ୧୮/୬(ସକାଳଖବର): ସ୍ଥାନୀୟ ଏସ୍ସିବି ମେଡ଼ିକାଲ କଲେଜ ହସ୍ପିଟାଲ ମେରୁଦଣ୍ଡ ଆଘାତ୍ ଚିକିତ୍ସା କେନ୍ଦ୍ରରେ ଚିକିତ୍ସାଧିନ ଥିବା କଟକ -ଚୌଦ୍ୱାର ବିଧାୟକ ପ୍ରଭାତ ବିଶ୍ୱାଳଙ୍କୁ ଆଜି କଂଗ୍ରେସ ନେତା ଭେଟି ତାଙ୍କ ଆଶୁ ଆରୋଗ୍ୟ କାମନା କରିଛନ୍ତି । କଟକ ନଗର କଂଗ୍ରେସ ସଭାପତି ମହମ୍ମଦ ମୋକିମ୍ ଡ଼ାକ୍ତରଖାନାରେ ପ୍ରଭାତ ବିଶ୍ୱାଳଙ୍କୁ ଭେଟି ସହର ପ୍ରତି ଥିବା ତାଙ୍କ ଅବଦାନକୁ ସ୍ୱୀକାର କରିବା ସହ ସେ ଶ୍ରୀଘ୍ର ସୁସ୍ଥ ହେବେ ବୋଲି ଆଶପ୍ରକାଶ କରିଥିଲେ । ତେବେ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକ ମଧ୍ୟ ପ୍ରଭାତଙ୍କୁ ଭେଟିବା ପାଇଁ ଆଜି ଡ଼ାକ୍ତରଖାନା ଆସିଥିଲେ ସୁଦ୍ଧା ସେ ତାଙ୍କୁ ଭେଟିନଥିବା ଜଣାପଡ଼ିଛି । ଡ଼ାକ୍ତରଖାନରେ ମୋକିମ୍ ଓ ନିରଞ୍ଜନ କିଛି ସମୟ କଥାବାର୍ତ୍ତା ହେବ ପରେ ମୋକିମ୍ ପ୍ରଭାତଙ୍କୁ ଭେଟିଥିଲେ । ନିରଞ୍ଜନ ଡ଼ାକ୍ତରଖାନା ପରିତ୍ୟାଗ କରିଥିଲେ । ନିରଞ୍ଜନଙ୍କ ସହ ପୂର୍ବତନ ବିଧାୟିକା ବିଜୟଲକ୍ଷ୍ମୀ ସାହୁ ଥିଲେ । ଗତ କିଛିଦିନ ତଳେ ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା ବିଧାୟକଙ୍କୁ ଭେଟି ତାଙ୍କ ଚିକିତ୍ସା ସଂପର୍କରେ ପଚାରି ବୁଝିଥିଲେ । ଦୀର୍ଘ ଦିନ ହେଲା ବିଶ୍ୱାଳ ଚିକତ୍ସାଧିନ ଥିଲେ ମଧ୍ୟ ବିଜେଡ଼ି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ସାକ୍ଷାତ କରିନାହାଁନ୍ତି । ଆଜି କଂଗ୍ରେସ ନେତା ପ୍ରଭାତଙ୍କୁ ସାକ୍ଷାତ କରିବା ପରେ ଏହାକୁ ନେଇ ରାଜନୈତିକ କଳ୍ପନାଜଳ୍ପନା ପ୍ରକାଶ ପାଇଛି ।