ବିଜେପି ଦଳର ମତିଭ୍ରମ ହେଲାଣି, ତାଙ୍କ ମୁଣ୍ଡ କାମ କରୁନି : ତାରା ବାହିନୀପତି
ଭୁବନେଶ୍ବର ୩।୯: ବିଜେପି ଦଳର ମତିଭ୍ରମ ହୋଇସାରିଲାଣି । ତାଙ୍କ ମୁଣ୍ଡ କାମ କରୁନି ବୋଲି କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି । ବିଧାନସଭା ମୌସୁମୀ ଅଧିବେଶନର ଦ୍ବିତୀୟ ଦିନରେ ବିଜେପି ଷ୍ଟାଫ୍ ସିଲେକସନ ପ୍ରସଙ୍ଗରେ ମୁଲତବୀ ପ୍ରସ୍ତାବ ଆଣିଥିଲା । ତୃତୀୟ ଦିନ ଆଇନ ଶୃଙ୍ଖଳା ପ୍ରସଙ୍ଗ ଆଣିଛି । ନିୟମ ଅନୁଯାୟୀ ଗୁରୁବାର ଆଲୋଚନା ହୋଇ ନଥିବା ପ୍ରସଙ୍ଗ ଶୁକ୍ରବାର ଆଲୋଚନା ହେବା କଥା । କିନ୍ତୁ ଗୁରୁବାର ମୁଲତବୀ ପ୍ରସ୍ତାବ ଆଲୋଚନା ହୋଇ ନଥିବା ବେଳେ କାହିଁକି ପୁଣି ଆଇନ ଶୃଙ୍ଖଳା ପ୍ରସଙ୍ଗ କଥା ଆଣିଲା ବିଜେପି ବୋଲି ପ୍ରଶ୍ନ କଲେ ତାରା ।
ଆମେ ପ୍ରଥମରୁ ଚାଷୀ ଓ ଷ୍ଟାଫ୍ ସିଲେକସନ କଥା କହିଛୁ । ଗୁରୁବାର ବିଜେପି ପ୍ରତାପ ଜେନା ପ୍ରସଙ୍ଗ ଉଠାଇ ଗୃହରେ ଫ୍ଲା କାର୍ଡ ଧରି ପ୍ରଦର୍ଶନ କରୁଥିଲେ ଆଜି କାହିଁକି ଚୁପ୍ ବସିଲେ ବୋଲି ମଧ୍ୟ ପ୍ରଶ୍ନ କରିଛନ୍ତି ତାରା । ମୂଷା ବିଲେଇକୁ ଦେଖି ଯେମତି ଲୁଚି ଚୁପ୍ ହୋଇ ବସେ ସେମିତି ଆଜି ପ୍ରତାପ ଜେନାଙ୍କ ପ୍ରସଙ୍ଗରେ ବିଜେପି ଲୁଚି ବସିଛି। ଏଥିରୁ ଜଣାପଡୁଛି ବିଜେଡି ଓ ବିଜେପି ମଧ୍ୟରେ ଡିଲ୍ ହୋଇଛି । ସେମାନେ ଭାଇ-ଭାଇ । କଂଗ୍ରେସ କାହା ସହିତ ନାହିଁ ବୋଲି ତାରା କହିଛନ୍ତି ।
