ବିଜେଡିର ରାଜ୍ୟସ୍ତରୀୟ ଆଦିବାସୀ ପ୍ରତିନିଧି ସମାବେଶ ଆଜି

ଭୁବନେଶ୍ୱର, ୦୮ ଅଗଷ୍ଟ - ଆସନ୍ତାକାଲି ପୂର୍ବାହ୍ନରେ ବିଶ୍ୱ ଆଦିବାସୀ ଦିବସ ଅବସରରେ ବିଜୁ ଜନତା ଦଳ ଆଦିବାସୀ ସାମୁଖ୍ୟ ପକ୍ଷରୁ ରାଜ୍ୟସ୍ତରୀୟ ଆଦିବାସୀ ପ୍ରତିନିଧି ସମାବେଶ ୟୁନିଟ୍ ୧ ଆଦିବାସୀ ପ୍ରଦର୍ଶନୀ ପଡିଆ ଠାରେ ଆୟୋଜିତ ହେବ । ଏହି ସମାବେଶକୁ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଉଦଘାଟନ ଦେବା ସହ ପ୍ରତିନିଧି ସମାବେଶକୁ ଉଦବୋଧନ ଦେବେ । ଏହି କାର୍ଯ୍ୟକ୍ରମରେ ରାଜ୍ୟ ଅନୁସୂଚିତ ଜନଜାତି କଲ୍ୟାଣ ମନ୍ତ୍ରୀ ରମେଶ ମାଝୀ ମଧ୍ୟ ଯୋଗ ଦେବେ ବୋଲି ଜନଜାତି ସାମୁଖ୍ୟର ରାଜ୍ୟ ଆବାହକ ସୁଦାମ ମାରାଣ୍ଡି ସୂଚନା ଦେଇଛନ୍ତି । ଏହି ସମାବେଶରେ ୯ଟି ଆଦିବାସୀ ଅଧ୍ୟୁଷିତ ଜିଲ୍ଲା ସମେତ ଓଡ଼ିଶାର ବିଭିନ୍ନ ପ୍ରାନ୍ତରୁ ଆଦିବାସୀ ପ୍ରତିନିଧିମାନେ ଯୋଗଦେବେ । ପରବର୍ତୀ ସମୟରେ ପର୍ଯ୍ୟାୟକ୍ରମେ ଅଗଷ୍ଟ ୧୩ ତାରିଖ ମଧ୍ୟରେ ସମ୍ପୃକ୍ତ ୯ଟି ଆଦିବାସୀ ଅଧ୍ୟୁଷିତ ଜିଲ୍ଲା ମାନଙ୍କରେ ଜିଲ୍ଲାସ୍ତରୀୟ ସମାବେଶ ପାଳନ କରାଯିବ ବୋଲି ସାମ୍ମୁଖ୍ୟର ଉପସଭାପତି ବଳଭଦ୍ର ମାଝୀ ସୂଚନା ଦେଇଛନ୍ତି ।