ଟ୍ରେନରେ ଅନ୍ତଃବସ୍ତ୍ର ପିନ୍ଧି ବୁଲିଲେ ଜେଡିୟୁ ବିଧାୟକ

ନୂଆଦିଲ୍ଲୀ: ବିହାରୀ ବିଧାୟକଙ୍କ ଅଶୋଭନୀୟ ଆଚରଣକୁ ନେଇ ଏବେ ଚର୍ଚ୍ଚା ଜୋର ଧରିଛି । ବିହାରର ଜନତା ଦଳ(ୟୁ)ର ବିଧାୟକ ଗୋପାଳ ମଣ୍ଡଳ ଯାତ୍ରୀରେ ଭରପୂର ଏକ ଟ୍ରେନରେ କେବଳ ଅନ୍ତଃବସ୍ତ୍ର ପିନ୍ଧି ବୁଲିବା ଜାତୀୟ ଗଣମାଧ୍ୟମରେ ଶିରୋନାମା ପାଲଟିଛି। ଗୁରୁବାର ପାଟନାରୁ ନୂଆଦିଲ୍ଲୀ ଯାଉଥିବା ତେଜସ୍ ରାଜଧାନୀ ଏକ୍ସପ୍ରେସରେ ତାଙ୍କର ଏଭଳି ଆଚରଣକୁ କେତେକ ଯାତ୍ରୀ ବିରୋଧ କରିବାରୁ ବିଧାୟକ ସେମାନଙ୍କୁ ଧମକଚମକ ଦେଇଥିବା ଅଭିଯୋଗ ମଧ୍ୟ ହୋଇଛି। ଅନ୍ୟ ପକ୍ଷରେ ବିଧାୟକ ଗୋପାଳ ମଣ୍ଡଳ କହିଛନ୍ତି ଯେ ତାଙ୍କର ପେଟ ଗୋଳମାଳ ହୋଇଥିଲା ତେଣୁ ବାରମ୍ବାର ପାଇଖାନା ଯିବାକୁ ପଡ଼ୁଥିଲା। ସେଥିପାଇଁ ସେ କେବଳ ଅନ୍ତଃବସ୍ତ୍ର ପିନ୍ଧିବାକୁ ବାଧ୍ୟ ହୋଇଥିଲେ। ସେହି ଟ୍ରେନରେ ଯାତ୍ରା କରୁଥିବା ପ୍ରସାଦ ପାଶ୍ବାନ୍ ନାମକ ଯାତ୍ରୀଙ୍କ ଅଭିଯୋଗ ଅନୁଯାୟୀ, ଯେଉଁମାନେ ତାଙ୍କର ଏଭଳି କାରନାମାକୁ ବିରୋଧ କଲେ ସେମାନଙ୍କୁ ଗାଳିମନ୍ଦ କରିବା ସହ ଗୁଳି ମାରିଦେବି ବୋଲି ଧମକ ଦେଇଥିଲେ ବିଧାୟକ। ଏହାପରେ ଯାତ୍ରୀମାନେ ଆରପିଏଫ କର୍ମୀଙ୍କୁ ଏ ନେଇ ଅଭିଯୋଗ କରିବା ପରେ ମଣ୍ଡଳଙ୍କୁ ଅନ୍ୟ ଏକ କମ୍ପାର୍ଟମେଣ୍ଟକୁ ସ୍ଥାନାନ୍ତରିତ କରାଯାଇଥିଲା। ଅନ୍ୟପକ୍ଷରେ ଗୋପାଳ ମଣ୍ଡଳଙ୍କ ବନ୍ଧୁ କୁନାଲ ସିଂ କହିଛନ୍ତି ଯେ ବିଧାୟକ ଟ୍ରେନରେ ଚଢ଼ିବା ପରେ ତାଙ୍କୁ ହଠାତ୍ ପାଇଖାନା ଲାଗିଥିଲା। ଫଳରେ ସେ ଲୁଙ୍ଗି କିମ୍ବା ଗାମୁଛା ବଦଳାଇବାକୁ ସମୟ ନ ପାଇ କେବଳ ଅନ୍ତଃବସ୍ତ୍ର ପିନ୍ଧି ଚାଲିଯାଇଥିଲେ। ଏହି ସମୟରେ କିଛି ଯାତ୍ରୀ ତାଙ୍କୁ ଆକଟ କରିଥିଲେ। ମାତ୍ର ଏ ଘଟଣା ନେଇ କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିବା କଥାକୁ ସେ ଅସ୍ବୀକାର କରିଛନ୍ତି।