ଟ୍ରକ୍ ଚାପାରେ ଯୁବକ ମୃତ

ବାରିପଦା, ୨/୩(ସକାଳଖବର): ମୟୂରଭଞ୍ଜ ଜିଲ୍ଲା ବେତନଟୀ ଥାନା ଅନ୍ତର୍ଗତ ବଙ୍ଗଳା ଛକ ନିକଟରେ ଏକ ବାଇକ୍ ରେ ବସୁଥିବା ବେଳେ ଭାରସାମ୍ୟ ହରାଇ ବାଇକ୍ ସହିତ ବାଇକ୍ ଚାଳକ ଓ ଆରୋହୀ ରାସ୍ତା ଉପରେ ପଡି ଯାଇଥିଲେ । ଏହି ସମୟରେ ପଛରୁ ଆସୁଥିବା ଏକ ଟ୍ରକ୍ ଚାପାରେ ଯୁବକଙ୍କ ମୃତୁ୍ୟ ଘଟିଥିଲା । ଘଟଣାକୁ ନେଇ ସେଠାରେ ଉତେଜନା ଦେଖାଦେଇଥିଲା । ସ୍ଥାନୀୟ ଲୋକେ ମୃତକଙ୍କ ପରିବାରକୁ ୧୦ ଲକ୍ଷ କ୍ଷତିପୂରଣ ଦାବିରେ ରାସ୍ତା ଅବରୋଧ କରିଥିଲେ । ବେତନଟୀ ଏସଡିପିଓ ଗୋବିନ୍ଦ ସେଠୀ ଘଟଣାସ୍ଥଳରେ ପହଂଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ରାସ୍ତା ଅବରୋଧ ହଟିଥିଲା । ସୂଚନା ଅନୁଯାୟୀ, ଆଜି ପୂର୍ବାହ୍ନ ପ୍ରାୟ ୧୧ଟା ୪୫ ମିନିଟ୍ ସମୟରେ ବେତନଟୀ ଥାନା ଅଧିନ ମଉଦା ଗ୍ରାମର ପ୍ରଭାକର ମହାନ୍ତଙ୍କ ପୁଅ ମଙ୍ଗଳ ମହାନ୍ତ (୩୩) ବଙ୍ଗଳା ଛକରେ ଏକ ବାଇକ୍ ନଂ ଓଆର୧୧ଡି-୩୫୧୮ ଯାଉଥିବା ବେଳେ ତାକୁ ଅଟକାଇ ଲିଫ୍ଟ ମାଗିଥିଲେ । ବାଇକ୍ ରେ ବସୁଥିବା ସମୟରେ ଭାରସାମ୍ୟ ହରାଇ ରାସ୍ତା ଉପରେ ପଡିଯିବାରୁ ତାଙ୍କ ଉପରେ ବାରିପଦାରୁ ବାଲେଶ୍ୱର ଅଭିମୁଖେ ଯାଉଥିବା ଏକ ପାଇପ୍ ବୋଝେଇ ଟ୍ରକ୍ ନଂ ଓଡ଼ି୦୪ଏଲ-୫୦୮୮ ଚଢି ଯାଇଥିଲା । ଫଳରେ ଘଟଣାସ୍ଥଳରେ ତାଙ୍କର ମୃତୁ୍ୟ ଘଟିଥିଲା । ଦୁର୍ଘଟଣା ସମ୍ପର୍କରେ ଖବର ପାଇ ମୃତକ ମଙ୍ଗଳଙ୍କ ଭାଇ ବେତନଟୀ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ପହଂଚି ଶବ ଜବତ କରିବା ସହ ଟ୍ରକ୍ ର ଡ୍ରାଇଭର ତଥା ମାଲିକ ବିହାର ରାଜ୍ୟର ସଞ୍ଜୟ ପ୍ରଧାନଙ୍କୁ ଥାନାରେ ଅଟକ ରଖିଛି । ଏ ସଂକ୍ରାନ୍ତରେ ୨୬/୧୯ରେ ଏକ ମାମଲା ରୁଜୁ କରି ପୋଲିସ ଘଟଣାର ତଦନ୍ତ ଚଳାଇଛି ।