ଷଷ୍ଠ ପୋଲିସ୍ କମିଶନର ଭାବେ ଦାୟିତ୍ୱ ନେଲେ ସତ୍ୟଜିତ୍ ମହାନ୍ତି
ଭୁବନେଶ୍ୱର,୩/୭( ସକାଳଖବର):ନୂତନ ପୋଲିସ୍ କମିଶନର ଭାବେ ନିଯୁକ୍ତି ପାଇଥିବା ଆଇପିଏସ୍ ସତ୍ୟଜିତ ମହାନ୍ତି ଶୁକ୍ରବାର କାର୍ଯ୍ୟରେ ଯୋଗ ଦେଇଛନ୍ତି । ଶୁକ୍ରବାର ପୂର୍ବାହ୍ନରେ ଡିଜି କ୍ୟାମ୍ପ ଅଫିସ୍ ଠାରେ ପୂର୍ବତନ ପୋଲିସ୍ କମିଶନର ୱାଇ ବି ଖୁରାନିଆଙ୍କ ଠାରୁ ଶ୍ରୀ ମହାନ୍ତି ଏହି ଦାୟିତ୍ୱ ଗ୍ରହଣ କରିଛନ୍ତି । ଶ୍ରୀ ମହାନ୍ତି କଟକ -ଭୁବନେଶ୍ୱର ଦୈତନଗରୀ କମିଶନରେଟ୍ ପୋଲିସ୍ ର ଷଷ୍ଠ କମିଶନର ଭାବେ ଦାୟିତ୍ୱ ନେଇଛନ୍ତି । ସେଠାରେ ତାଙ୍କୁ ଗାର୍ଡ ଅଫ୍ ଅନର ଦିଆଯାଇଥିଲା । ଏହି ଅବସରରେବହୁ ବରିଷ୍ଠ ପୋଲିସ୍ ଅଧିକାରୀ , ସବୁ ଥାନାର ଅଧିକାରୀ ପ୍ରମୁଖ ଉପସ୍ଥିତ ଥିଲେ ।
ଶ୍ରୀ ମହାନ୍ତି କଟକ-ଭୁବନେଶ୍ୱରର ନାଗରିକ ମାନଙ୍କୁ ସୁରକ୍ଷା ଯୋଗାଇ ଦେବାପାଇଁ ପ୍ରଚେଷ୍ଟା କରିବେ ବୋଲି କହିଛନ୍ତି । ଲୋକଙ୍କୁ ନେଇ କାମ କରିବେ ଏବଂ ସେମାନଙ୍କ ଆସ୍ଥାଭାଜନ ହେବା ପାଇଁ ଉଦ୍ୟମ କରିବେ । ଆଗାମୀ ନଭେମ୍ବରରେ ଭୁବନେଶ୍ୱରରେ ହେବାକୁ ଥିବା ବିଶ୍ୱକପ୍ ହକି ସମୟରେ ସୁରକ୍ଷା ରକ୍ଷା ଆମ ପାଇଁ ଚ୍ୟାଲେଂଜ ହେବ । କମ୍ୟୁନିଟି ପୋଲିସ୍ କୁ ସର୍ବାଧିକ ଗୁରୁତ୍ୱ ଦିଆଯିବ । ଖୁବ୍ ଶୀଘ୍ର ଷ୍ଟୁଡେଂଟ ପୋଲିସ୍ କ୍ୟାଡର ଆରମ୍ଭ କରାଯିବ ବୋଲି ସେ କହିଛନ୍ତି । ପୋଲିସ୍ ମାନଙ୍କୁ ପବ୍ଲିକ୍ ଫ୍ରେଣ୍ଡଲିି କରାଯିବ । ହକି ବିଶ୍ୱକପ୍ ରେ ଭାଗନେବା ପାଇଁ ଓଡିଶା ଆସୁଥିବା ଖେଳାଳୀ ଓ ପର୍ଯ୍ୟଟକ ମାନେ ଯେଭଳି ଭଲ ଅନୁଭବ ନେଇ ଫେରିବେ ସେଥିପାଇଁ ଉଦ୍ୟମ କରାଯିବ । ସରକାର ଯେଉଁ ଆସ୍ଥା ଓ ବିଶ୍ୱାସ ରଖି ତାଙ୍କୁ ଏହି ଦାୟିତ୍ୱ ଦେଇଛନ୍ତି ତାହାକୁ ସେ ସୁଚାରୁ ରୂପେ ନିର୍ବାହ କରିବେ ।
