ହାତୀପଲ ଭାଙ୍ଗିଲେ ଘର ଓ ପାଚେରୀ

କେନ୍ଦୁଝର,୧୬/୯(ସକାଳଖବର): କେନ୍ଦୁଝର ଜିଲ୍ଲା ଚମ୍ପୁଆ ରେଞରେ ହାତୀ ଆତଙ୍କର ଅନ୍ତ ଘଟିବାର ନାଁ ଧରୁନାହିଁ । ଏବେ ପୁଣି କିଛି ଦିନର ବ୍ୟବଧାନରେ ବଣୁଆ ହାତୀପଲ ଚମ୍ପୁଆ ରେଞକୁ ଫେରିଛନ୍ତି । ଏହି ହାତୀ ପଲରେ ୨୨ ଟି ଝାଡଖଣ୍ଡୀ ହାତୀ ରହିଛନ୍ତି । ଏହି ହାତୀପଲ ଏବେ ବର୍ଦ୍ଧନା ଜଙ୍ଗଲରେ ଡେରା ପକାଇଛନ୍ତି । ରବିବାର ଦିନ ବିଳମ୍ବିତ ରାତ୍ରୀରେ ହାତୀପଲ କରଞିଆ ରେଞ୍ଜରୁ ବୈତରଣୀ ନଦୀପାର ହୋଇ ନନ୍ଦପୁର ଗ୍ରାମକୁ ଧସେଇ ପଶିଛନ୍ତି । ନନ୍ଦପୁର ଗ୍ରାମର ଶବଚ୍ଚ ମୁଣ୍ଡାଙ୍କ ଘର ଭାଙ୍ଗିଛନ୍ତି । ଏବଂ ଘରେ ସଂଚିତ ହୋଇ ରହିଥିବା ଧାନ ଚାଉଳ ଖାଇବା ସହ ନଷ୍ଟ କରି ପକାଇଛନ୍ତି । ଅନୁରୁପ ଭାବେ ଗ୍ରାମର ରାଧାକାନ୍ତ ମହାନ୍ତଙ୍କ ଘରର ପ୍ରାଚେରୀ ଭାଙ୍ଗିବା ସହ ବରପଦା ଗ୍ରାମର ମିତ୍ରଭାନୁ ମହାନ୍ତଙ୍କ କୋବି ବାଗାନ କୁ ଦଳି ଚକଟି ମାଟିରେ ମିଶାଇ ଦେଇଥିଲେ । ଏବଂ ପରେ ପରେ ସହଦେବ ମୁଣ୍ଡାଙ୍କର ବିରାଟ ପନି ପରିବା ଚାଷ ଓ ଧାନ ଫସଲ କୁ ସଂପୁର୍ଣ୍ଣ ନଷ୍ଟ କରି ପକାଇଛନ୍ତି । ହାତୀପଲଙ୍କୁ ଘଉଡାଇବା କିମ୍ବା ଅଂଚଳବାସୀଙ୍କୁ ସେମାନଙ୍କ କବଳରୁ ସୁରକ୍ଷା ଦେବାରେ ପ୍ରାୟତଃ ବନ ବିଭାଗ ସଫଳ ହୋଇପାରୁ ନାହିଁ । ଏହି ଘଟଣାକୁ ନେଇ ଅଂଚଳବାସୀଙ୍କ ମଧ୍ୟରେ ଅସନ୍ତୋଷ ଲାଗି ରହିଥିବା ବେଳେ ଗ୍ରାମବାସୀମାନେ ଆତଙ୍କିତ ଅବସ୍ଥାରେ ରହିଛନ୍ତି