ସମାଜସେବା ମୁଖ୍ୟ ଲକ୍ଷ୍ୟ - ଦେବୀ

ଜଗତ୍ସିଂହପୁର ଲୋକସଭା ନିର୍ବାଚନମଣ୍ଡଳୀରୁ ୨ ଥର ସାଂସଦ ହେବା ସହ ରାଜ୍ୟ ବିଧାନସଭାକୁ ୪ ଥର ନିର୍ବାଚିତ ହୋଇଥିବା ସ୍ୱର୍ଗତ ଲକ୍ଷ୍ମଣ ମଲ୍ଲିକଙ୍କ ପୁତ୍ର ଦେବୀ ପ୍ରସାଦ ମଲ୍ଲିକ (୫୪) ପିତାଙ୍କ ପଦାଙ୍କ ଅନୁସରଣ କରି ଏବେ ନର୍ବାଚନମଣ୍ଡଳୀରେ ସମାଜସେବାରେ ବ୍ରତୀ ଅଛନ୍ତି । ସେ ଜଣେ ଉଚ୍ଚଶିକ୍ଷିତ ବ୍ୟକ୍ତି । ରାଜ୍ୟ ସରକାରଙ୍କ ବିଭିନ୍ନ ଉଦ୍ୟୋଗରେ ଦୀର୍ଘ ବର୍ଷ ଧରି ଉଚ୍ଚ ପଦବୀରେ ୩୧ ବର୍ଷ ଧରି କାର୍ଯ୍ୟ କରିଥିବା ଦେବୀ ସରକାରୀ ଚାକିରୀରୁ ସ୍ୱେଚ୍ଛାକୃତ ଅବସର ନେଇ ଜଗତ୍ସିଂହପୁର ସହ ଅଧିକରୁ ଅଧିକ ଜଡ଼ିତ ହୋଇଛନ୍ତି । ବିରିଡ଼ି ବ୍ଳକ ବଡ଼ଖଣ୍ଡାଏତା ବାସିନ୍ଦା ଦେବୀଙ୍କ ଲକ୍ଷ୍ୟ ସଂପର୍କରେ ‘ସକାଳଖବର’ର ଏକ ଆଲୋଚନା । - ପ୍ରଶ୍ନ: ଜଗତ୍ସିଂହପୁର ଜିଲ୍ଲାର ସମସ୍ୟା କଣ ରହିଛି ? - ଉତ୍ତର : ପାରାଦ୍ୱୀପକୁ ଛାଡ଼ିଦେଲେ ଜିଲ୍ଲାର ଅନ୍ୟ କୌଣସି ସ୍ଥାନରେ ଶିଳ୍ପାନୁଷ୍ଠାନ ନାହିଁ । ଏଠାରେ ଏକ ମେଡ଼ିକାଲ କଲେଜ ପାଇଁ ଜନସାଧାରଣ ଦାବି କରୁଛନ୍ତି । ସରକାରୀ ଇଞ୍ଜିନିୟରିଂ କଲେଜଟିଏ ମଧ୍ୟ ଏଠାରେ ନାହିଁ । ଚିନି କଳଟିଏ ନଥିବାରୁ ଆଖୁଚାଷ ପାଇଁ ଚାଷୀ ଆଗ୍ରହ ପ୍ରକାଶ କରୁନାହାଁନ୍ତି । ଶୀତଳଭଣ୍ଡାର ନଥିବାରୁ ଆଳୁ ନଷ୍ଟ ହେଉଛି । ଏସବୁର ପ୍ରତିକାର ଆବଶ୍ୟକ । - ପ୍ରଶ୍ନ: ପିତାଙ୍କ ପରି ଆପଣ ଜିଲ୍ଲାର ରାଜନୀତି କ୍ଷେତ୍ରକୁ ଆସିବେ କି ? - ଉତ୍ତର: ଜନସାଧାରଣଙ୍କ ପାଇଁ କାର୍ଯ୍ୟ କରିବା ମୋର ମୁଖ୍ୟ ଲକ୍ଷ୍ୟ । ବିଧାୟକ ବା ସାଂସଦ ହେବା ପାଇଁ କୌଣସି ଯୋଜନା ନାହିଁ । ଯଦି ରାଜନୀତିର ସୁଯୋଗ ମିଳେ ତାହାଲେ ଏହାକୁ ସେ ଆପଣେଇବେ । ରାଜନୀତିରେ ସମାଜସେବାକୁ ବ୍ୟାପକ କରାଯାଇପାରିବ । - ପ୍ରଶ୍ନ: କେଉଁ ଦଳରୁ ଟିକେଟ ପାଇଁ ଆଶାୟୀ ? - ଉତ୍ତର: ସେଭଳି ନିର୍ଦ୍ଧିଷ୍ଟ କିଛି ଦଳ ନାହିଁ । - ପ୍ରଶ୍ନ: ବର୍ତ୍ତମାନର ରାଜ୍ୟ ବିଜେଡ଼ି ସରକାର ଓ କେନ୍ଦ୍ରର ବିଜେପି ସରକାର ସଂପର୍କରେ ମତ କଣ ? - ଉତ୍ତର: କଂଗ୍ରେସ ସରକାର ସମୟରେ ଦେଶରେ ଯେତେ ସଂଖ୍ୟକ ଶିଳ୍ପାନୁଷ୍ଠାନ ଥିଲା ତାହା ବର୍ତ୍ତମାନ ହ୍ରାସ ପାଇଛି । ରାଜ୍ୟରେ ବେକାରୀ ବେରୋଜଗାରୀ ବୃଦ୍ଧି ପାଇଛି । - ପ୍ରଶ୍ନ: ବିଜେଡ଼ିର ଜଗତ୍ସିଂହପୁର ସାଂସଦଙ୍କ କାର୍ଯ୍ୟଧାରା ସଂପର୍କରେ ଆପଣଙ୍କ ମତ କଣ ? - ଉତ୍ତର: ସ୍ଥାନୀୟ ସାଂସଦ ନିର୍ବାଚନମଣ୍ଡଳୀ ପାଇଁ କିଛି କରିନାହାଁନ୍ତି । ସଂସଦରେ ମଧ୍ୟ କିଛି ପ୍ରଶ୍ନ ପଚାରି ନାହାଁନ୍ତି ।