ବୌଦ୍ଧ ଜିଳାର ପୁରା ଉଆଁସ ଓ ଲଙ୍କାପୋଡି ପର୍ବ

ବୌଦ୍ଧ, ୩୦/୮(ସକାଳଖବର): ସମଗ୍ର ପଶ୍ଚିମ ଓଡିଶାର ନିଆର ପର୍ବ ପୁରା ଉଆଁସ । ଆଜି ହେଲା ସପ୍ତପୁରୀ ଅମାବାସ୍ୟା । ବୌଦ୍ଧ ଜିଲାର ସମସ୍ତ ଗ୍ରାମ ଗୁଡିକ ଚଳ ଚଂଚଳ ହୋଇପଡିଛି ଏହି ପାରମ୍ପରିକ ପର୍ବକୁ ନେଇ । ବୌଦ୍ଧ ଜିଲାରେ ସପ୍ତପୁରୀ ଅମାବାସ୍ୟା କୁ ପୂରା ଉଆଁସ ଭାବେ ପାଳନ କରାଯାଇଥାଏ । ପ୍ରତ୍ୟେକ ଗ୍ରାମରେ ଅଧିଷ୍ଠାତ୍ରୀ ଦେବାଦେବୀଙ୍କ ପୀଠରେ ସ୍ୱତନ୍ତ୍ର ପୂଜା କରାଯିବା ପରେ ଆରମ୍ଭ ହୋଇଥାଏ ଏହି ପର୍ବ । ଅପରାହ୍ନରେ ଛୋଟଛୋଟ ପୁଅ ପିଲାମାନେ କାଠ, ମାଟି ତିଆରି ହାତୀ, ଘୋଡ଼ା,ମାଙ୍କଡ ଓ ଷଣ୍ଡ ଆଦିକୁ ଫୁଲ , ସିନ୍ଦୁର ଦେଇ ସଜ୍ଜିତ କରି ଖେଳିବାକୁ ବାହାରିଥାନ୍ତି । ଗ୍ରାମର ମନ୍ଦିର ପ୍ରାଙ୍ଗଣରେ କିମ୍ବା ବିଦ୍ୟାଳୟ ପରିସରରେ ଏହି ଖେଳ ଜମିଥାଏ । ପିଲାମାନେ ନିଜନିଜ ହାତୀ ଘୋଡ଼ା ମଧ୍ୟରେ ଲଢେ଼ଇ କରାନ୍ତି । ପିଲାମାନେ କୁନିକୁନି ଝିଅମାନଙ୍କ ଠାରୁ ନିଜ ହାତୀ ଘୋଡ଼ା ପାଇଁ ଖାଦ୍ୟ ମାଗିଥାଆନ୍ତି । ଏପଟେ କୁନିକୁନି ଝିଅମାନେ ହାତରେ ଚାଙ୍ଗୁଡି ଓ କୂଲା ଧରି ଛୋଟ ଛୋଟ ମାଟି ନିର୍ମିତ ପାତ୍ରରେ ବିଭିନ୍ନ ଖାଦ୍ୟଶସ୍ୟ ଯଥା ମକା, ଶିମ୍ବ, ମୁଗ, କୋଳଥ, ଲିଆ, ସାତ ପ୍ରକାର ଚଣା ଧରି ସେଠାରେ ଏକତ୍ରିତ ହୋଇଥାଆନ୍ତି । ନିଜନିଜ ମଧ୍ୟରେ ଏହି ଖାଦ୍ୟକୁ ଆଦାନ ପ୍ରଦାନ କରିବା ସହ ପିଲାମାନଙ୍କୁ ବାଂଟି ଥାଆନ୍ତି । ଏହି ନିଆରା ପରମ୍ପରା କୁଶାଣ ରାଜତ୍ୱ ସମୟରୁ ପାଳିତ ହୋଇଆସୁଥିବାର କୁହାଯାଏ । ଏହି ପର୍ବ ପାଳନ ମାଧ୍ୟମରେ ପିଲାମାନଙ୍କୁ ଯୁଦ୍ଧ ଓ ଝିଅମାନଙ୍କୁ ଘରକରଣାର ଶିକ୍ଷା ଦିଆଯାଉଥିଲା । ଏହି ପରମ୍ପରା ଭାଇ ଚାରର ବାର୍ତ୍ତା ଦେବା ସହ ମିଳିମିଶି ଚଳିବାକୁ ଶିକ୍ଷା ଦେଇଥାଏ । ଏହି ପର୍ବ ଉପଲକ୍ଷେ ୩ ଦିନ ପୂର୍ବରୁ ବଜାର ଗୁଡିକରେ ପର୍ବପାଇଁ ଆବଶ୍ୟକ ହେଉଥିବା ଚାଙ୍ଗୁଡି, ମାଟିର ବିିଭିନ୍ନ ସାମଗ୍ରୀ, କାଠ ଓ ମାଟିର ନିର୍ମିତ ଘୋଡା, ହାତୀ ସବୁ ବିକ୍ରୟ ପାଇଁ ପସରା ବସିଥାଏ ।