ଆମ ଓଡ଼ିଶା- କଂଗ୍ରେସ ମଧୁଚନ୍ଦ୍ରିକା, କଂଗ୍ରେସରେ ଯୋଗଦେଲେ ଶୁଭଶ୍ରୀ

ଭୁବନେଶ୍ୱର, ୨୦/୮ (ସକାଳଖବର): ମାଓ ନେତା ସବ୍ୟସାଚୀ ପଣ୍ଡାଙ୍କର ପତ୍ନୀ ଶୁଭଶ୍ରୀ ପଣ୍ଡା ଆଜି କଂଗ୍ରେସ ଭବନକୁ ଆସି ଦଳୀୟ ସଭାପତି ନିରଂଜନ ପଟ୍ଟନାୟକ ଏବଂ ଓଡ଼ିଶାର ପ୍ରଭାରୀ ଜିତେନ୍ଦ୍ର ସିଂଙ୍କ ଉପସ୍ଥିତିରେ କଂଗ୍ରେସ ଦଳରେ ଯୋଗ ଦେଇଛନ୍ତି । ତାଙ୍କ ସହିତ ଆସିଥିବା ସମସ୍ତ ସମର୍ଥକ ଏବଂ ଶୁଭେଛୁମାନେ ମଧ୍ୟ କଂଗ୍ରେସ ଦଳରେ ଯୋଗ ଦେଇଛନ୍ତି । ଗତ ନିର୍ବାଚନରେ ଶୁଭଶ୍ରୀ ଆମ ଓଡ଼ିଶା ଦଳରୁ ପ୍ରାର୍ଥୀ ହୋଇ ରଣପୁରରୁ ପରାଜିତ ହୋଇଥିଲେ । ଇତିମଧ୍ୟରେ ଆମ ଓଡ଼ିଶା ଦଳ ଅଧ୍ୟକ୍ଷ ସୌମ୍ୟରଞ୍ଜନ ପଟ୍ଟନାୟକ ବିଜେଡ଼ିରେ ଯୋଗଦେଇ ରାଜ୍ୟସଭାକୁ ଯିବା ପରେ ଶୁଭଶ୍ରୀ ଦଳ ତ୍ୟାଗ କରି କଂଗ୍ରେସରେ ଯୋଗ ଦେଇଛନ୍ତି । ଉଲ୍ଲେଖନୀୟ ଯେ ସୌମ୍ୟରଞ୍ଜନ ପଟ୍ଟନାୟକଙ୍କ ବଡ଼ଭାଇ ନିରଞ୍ଜନ ପଟ୍ଟନାୟକ ଏବେ ରାଜ୍ୟ କଂଗ୍ରେସର ସଭାପତି ଅଛନ୍ତି । ଏହା ବ୍ୟତୀତ ନୀଳଗିରିର ରାଣୀ ମନୋଜ ମଂଜରୀ ଦେବୀ ତାଙ୍କ ସମର୍ଥକ ମାନଙ୍କ ସହିତ ଆସି କଂଗ୍ରେସ ଦଳରେ ଯୋଗ ଦେଇଛନ୍ତି । ପ୍ରଭାରୀ ଶ୍ରୀ ସିଂ ଏବଂ ପିସିସି ସଭାପତି ଶ୍ରୀ ପଟ୍ଟନାୟକ ଓ ୩ ଜଣ କାର୍ଯ୍ୟକାରୀ ସଭାପତି ନବ ଦାସ, ଚିରଞ୍ଜିବ ବିଶ୍ୱାଳ, ପ୍ରଦୀପ ମାଝୀ ସେମାନଙ୍କୁ ସ୍ୱାଗତ ଜଣାଇଥଲେ । ସଭାପତି ଶ୍ରୀ ପଟ୍ଟନାୟକ କହିଥିଲେ ଯେ, ଏମାନଙ୍କ ଯୋଗଦାନ କଂଗ୍ରେସର ସାଂଗଠନିକ ଶକ୍ତିକୁ ସୁଦୃଢ଼ କରିବାରେ ସହାୟକ ହୋଇଛି ।