ହଟିଲା ଏହି କଟକଣା: ଏଣିକି ଶତ ପ୍ରତିଶତ ଯାତ୍ରୀଙ୍କୁ ନେଇ ଉଡ଼ିପାରିବ ବିମାନ
ନୂଆଦିଲ୍ଲୀ: ଦେଶରେ ଧିରେ ଧିରେ କରୋନା ସଂକ୍ରମଣ କମିବାରେ ଲାଗିଛି । ତେଣୁ କେନ୍ଦ୍ର ସରକାର ଗୋଟିଏ ପରେ ଗୋଟିଏ କରୋନା କଟକଣା ହଟାଇବାରେ ଲାଗିଛନ୍ତି । ଏହି କ୍ରମରେ ଯାତ୍ରୀବାହି ବିମାନ ଏଣିକି ପୂର୍ଣ୍ଣ ଯାତ୍ରୀ କ୍ଷମତା ସହ ଉଡ଼ିପାରିବ ଓ ଉଡାଣ ଉପରେ ଲଗାଯାଇଥିବା ପ୍ରତିବନ୍ଧକ ଅକ୍ଟୋବର ୧୮ ତାରିଖଠାରୁ ହଟାଇ ଦିଆଯିବ ବୋଲି ବିମାନ ଚଳାଚଳ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।
ବିମାନ ଚଳାଚଳ ମନ୍ତ୍ରାଳୟ ପକ୍ଷରୁ କୁହାଯାଇଛି କି, ଯେ ଅକ୍ଟୋବର ୧୮ରୁ ସମସ୍ତ ଘରୋଇ ବିମାନ ୧୦୦ ପ୍ରତିଶତ ଯାତ୍ରୀ କ୍ଷମତା ସହିତ ପରିଚାଳିତ ହେବ। ବର୍ତ୍ତମାନ ପର୍ଯ୍ୟନ୍ତ ୮୫ ପ୍ରତିଶତ ଯାତ୍ରୀ କ୍ଷମତାକୁ ନେଇ ଘରୋଇ ବିମାନ ଉଡାଣ କରୁଥିଲା | ଏହା ପୂର୍ବରୁ ଏହି କ୍ଷମତା ୭୨.୫ ପ୍ରତିଶତ ଥିଲା। ସୂଚନା ଥାଉ କି ଗତ ବର୍ଷ କରୋନା ଲକଡାଉନରେ ଉଡ଼ାଣ ଉପରେ ସମ୍ପୂର୍ଣ୍ଣ ନିଷେଧାଦେଶ ପରେ ମେ ୨୫, ୨୦୨୦ରେ, ସରକାର ୩୩ ପ୍ରତିଶତ ଯାତ୍ରୀ କ୍ଷମତାକୁ ନେଇ ବିମାନ ଉଡ଼ାଣ ପାଇଁ ଅନୁମତି ଦେଇଥିଲେ। ଏହା ପରେ ଡିସେମ୍ବର ୨୦୨୦ରେ ଏହାକୁ ୮୦ ପ୍ରତିଶତକୁ ବୃଦ୍ଧି କରାଯାଇଥିଲା |
ପୁଣି ଚଳିତ ବର୍ଷ ଏପ୍ରିଲ ଏବଂ ମେ ମାସରେ କରୋନା ଦ୍ଵିତୀୟ ଲହରୀ ପାଇଁ ସରକାର ଘରୋଇ ବିମାନରେ ଯାତ୍ରୀଙ୍କ କ୍ଷମତାକୁ ୫୦ ପ୍ରତିଶତକୁ ହ୍ରାସ କରିଥିଲେ । ଏହା ପରେ, କରୋନା ସଂକ୍ରମଣ କମିବା ପରେ ଯାତ୍ରୀଙ୍କ କ୍ଷମତାକୁ ବଢାଯାଇଛି ଏବଂ ବର୍ତ୍ତମାନ ଏହାକୁ ଶତପ୍ରତିଶତ କରାଯାଇଛି।
