ପିଲାଙ୍କ ସହ ଶିଶୁ ଦିବସ ପାଳିତ ମୁଖ୍ୟମନ୍ତ୍ରୀ

ଭୁବନେଶ୍ୱର, ୧୪/୧୧ (ସକାଳଖବର): ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଆଜି ସଚିବାଳୟରେ ଛୋଟପିଲାମାନଙ୍କ ସହିତ ଶିଶୁ ଦିବସ ପାଳନ କରିଛନ୍ତି । ଘାଟିକିଆ କଳିଙ୍ଗ ବିହାରର ଦି ୱିସଡମ୍ ଟି୍ର ଗ୍ଲୋବାଲ ସ୍କୁଲର ୨ରୁ ୪ ବର୍ଷ ବୟସର କିଣ୍ଡର ଗାର୍ଟନର ପିଲାମାନେ ଆଜି ସଚିବାଳୟ ଆସି ମୁଖ୍ୟମନ୍ତ୍ରୀଙ୍କ ସହ କିଛି ସମୟ ବିତାଇଥିଲେ । ପିଲାମାନଙ୍କୁ ଚକଳେଟ ବାଂଟି ଶିଶୁ ଦିବସର ଶୁଭେଚ୍ଛା ଜଣାଇଥିଲେ ମୁଖ୍ୟମନ୍ତ୍ରୀ । କୁନି କୁନି ପିଲାମାନଙ୍କ ସହିତ ସମୟ ବିତାଇ, ସେମାନଙ୍କ ସହିତ ଫଟୋ ଉଠାଇ ମୁଖ୍ୟମନ୍ତ୍ରୀ ଖୁବ୍ ଖୁସି ଜଣାପଡ଼ୁଥିଲେ । ପିଲାମାନେ ମଧ୍ୟ ମୁଖ୍ୟମନ୍ତ୍ରୀଙ୍କୁ ଘରଚଟିଆ ଚଢେ଼ଇର ବସା ଉପହାର ଦେଇଥିଲେ । ସୂଚନାଯୋଗ୍ୟ ଯେ ଘରଚଟିଆ ଚଢେ଼ଇ ଏକ ବିଲୁପ୍ତପ୍ରାୟ ପ୍ରଜାତିର ପକ୍ଷୀ ଭାବରେ ପରିଗଣିତ । ଏହାର ସୁରକ୍ଷା ପାଇଁ ସ୍କୁଲର ଶିକ୍ଷକ ଶିକ୍ଷୟତ୍ରୀମାନଙ୍କ ଉଦ୍ୟମ ପାଇଁ ମୁଖ୍ୟମନ୍ତ୍ରୀ ସେମାନଙ୍କୁ ଧନ୍ୟବାଦ ଦେଇଥିଲେ ।