ଅଭିନବ ଉପାୟରେ କରୁଥିଲେ ଗଞ୍ଜେଇ ଚାଲାଣ, ଅଧାବାଟରେ ମାଡିବସିଲା ପୋଲିସ

ଲମତାପୁଟ ୨୮।୧୨: ଗଞ୍ଜେଇ ବୋଝେଇ ପିକଅପ ଭ୍ୟାନରୁ ୨୦ଲକ୍ଷ ଟଙ୍କାର ଗଞ୍ଜେଇ ଜବତ । ଘଟଣାରେ ଦୁଇ କିଙ୍ଗ୍ ପିନ ଗିରଫ ହୋଇଥିବା ବେଳେ ଦୁଇ ଜଣ ଫେରାର ହୋଇଯାଇଛନ୍ତି । ଗାଡ଼ିରେ ଥିବା ୧୦ଟି ବସ୍ତାରୁ ପ୍ରାୟ ୨ କ୍ୱିଣ୍ଟାଲ ଗଞ୍ଜେଇ ଜବତ କରିଛି ପୋଲିସ । ବିଶେଷ ସୂତ୍ରରୁ ଖବର ପାଇ କୋରାପୁଟ ଏସପି ଙ୍କ ନିର୍ଦ୍ଦେଶ କ୍ରମେ ଏସଡିପିଓଙ୍କ ନେତୃତ୍ଵରେ ନନ୍ଦପୁର ପୋଲିସ ଥୁବା ଗ୍ରାମ ନିକଟ ନାକା ବାନ୍ଧି କରିଥିଲା । ଦ୍ରୁତ ଗତିରେ ଆସୁଥିବା ପିକଅପ୍ ଗାଡ଼ିକୁ ଅଟକାଇବାକୁ ଉଦ୍ୟମ କରିଥିଲେ । କିନ୍ତୁ ଗାଡ଼ିଟି ବ୍ୟାରିକେଡ ଭାଙ୍ଗି ଚାଲିଯାଇଥିଲା । ପୋଲିସ ପ୍ରାୟ ୨ କିମି ପିଛା କରି ଗାଡ଼ିକୁ ଅଟକାଇବାରେ ସକ୍ଷମ ହୋଇଥିଲା । ପୋଲିସ ଗାଡ଼ିକୁ ଅଟକାଇବା ଦେଖି ୨ଜଣ ମାଫିଆ ଫେରାର ହୋଇଯାଇଥିବା ବେଳେ ଅନ୍ୟ ୨ଜଣଙ୍କୁ କାବୁ କରିବାରେ ସକ୍ଷମ ହୋଇଥିଲା । ଗାଡିକୁ ଯାଞ୍ଚ କରିବାରୁ ଅଭିନବ ଉପାୟରେ ଆଲୁମିନିୟମ ଟ୍ରଙ୍କ ଭିତରେ ୧୦ଟି ବସ୍ତାରେ ପ୍ରାୟ ୨ କ୍ୱିଣ୍ଟାଲ ଗଞ୍ଜେଇ ଜବତ କରିଥିଲା ପୋଲିସ । ଏହି ଗଞେଇ ମୂଲ୍ୟ ପ୍ରାୟ ୨୦ ଲକ୍ଷ ଟଙ୍କା ହେବ ବୋଲି ପୋଲିସ କହିଛି । ତେବେ ଗିରଫ ବ୍ୟକ୍ତି ମାନେ ହେଲେ ପାଡୁଆ ଥାନା ଚମ୍ପାପୁଟ ଗାଁର ନାଗେଶ୍ଵର ଗୁମ୍ଫ ରାୟ ଏବଂ ଭୂଷଣ ଗୁମ୍ପ ରାୟ ବୋଲି ଜଣାପଡିଛି । ଏହି ଦୁଇ ମାଫିଆଙ୍କୁ ପଚାର ଉଚାର ପରେ ଫେରାର ଥିବା ଦୁଇ ମାଫିଆ ଙ୍କ ନାମ ଜଣାପଡ଼ିଛି । ପୋଲିସ ସେହି ଦୁଇ ଜଣଙ୍କ ନାମ ଗୋପୋନୀୟ ରଖିଛି ।ଖୁବ୍ ଶୀଘ୍ର ଗିରଫ କରାଯିବା ନେଇ ପୋଲିସ ସୂଚନା ଦେଇଛି ।