ସଡ଼କ ସୁରକ୍ଷା ସପ୍ତାହ ଉଦ୍ୟାପିତ

ଅନୁଗୋଳ,୧୦/୧(ସକାଳଖବର): ଗତ ୪ ତାରିଖଠାରୁ ଆରମ୍ଭ ହୋଇଥିବା ୩୦ତମ ସଡ଼କ ସୁରକ୍ଷା ସପ୍ତାହ ପାଳନ ଆଜି ଉଦ୍ୟାପିତ ହୋଇଯାଇଛି । ଆଜି ସ୍ଥାନୀୟ ଜିଲା ଟ୍ରକ ମାଲିକ ସଂଘର କାର୍ଯ୍ୟାଳୟଠାରେ ଉଦ୍ୟାପନ ସମାରୋହ ଆୟୋଜିତ ହୋଇଥିଲା । ସ୍ଥାନୀୟ ଆଞ୍ଚଳିକ ପରିବହନ ଅଧିକାରୀ ଶ୍ରୀ ଧନଞ୍ଜୟ ସେନାପତିଙ୍କ ପରିଚାଳନାରେ ଆୟୋଜିତ ସଭାରେ ଅତିରିକ୍ତ ଜିଲାପାଳ ଶ୍ରୀ ତପନ କୁମାର ଶତପଥି ମୁଖ୍ୟ ଅତିଥି ଏବଂ ଟ୍ରକ ମାଲିକ ସଂଘର ସଭାପତି ଶ୍ରୀ ବିଭୂତି ଭୂଷଣ ଦାସ, ସଂପାଦକ ଶ୍ରୀ ଅକ୍ଷୟ କୁମାର ସାମନ୍ତ, ସନ୍ତୋଷ କୁମାର ମିଶ୍ର ପ୍ରମୁଖ ସମ୍ମାନୀତ ଅତିଥି ଭାବରେ ଯୋଗଦେଇଥିଲେ । ଦୁର୍ଘଟଣାକୁ ନିୟନ୍ତ୍ରଣ ପାଇଁ ସବୁସ୍ତରରେ ବ୍ୟାପକ ଜନସଚେତନତା ସୃଷ୍ଟି କରିବାର ଆବଶ୍ୟକତା ରହିଛି ବୋଲି ମୁଖ୍ୟ ଅତିଥି ଗୁରୁତ୍ୱ ଆରୋପ କରିଥିଲେ । ଏହି ଅବସରରେ ବିଦ୍ୟାଳୟ ଉଚ୍ଚ ବିଦ୍ୟାଳୟ ଏବଂ ମହାବିଦ୍ୟାଳୟସ୍ତରରେ ହୋଇଥିବା ବିଭିନ୍ନ ପ୍ରତିଯୋଗିତାର କୃତୀ ପ୍ରତିଯୋଗୀମାନଙ୍କୁ ଅତିଥିମାନେ ପୁରସ୍କାର ପ୍ରଦାନ କରିଥିଲେ । ୨ଜଣ ଶ୍ରେଷ୍ଠ ଗାଡ଼ି ଚାଳକ, ଏବଂ ୪ ଜଣଙ୍କୁ ଗୁଡ଼ ସମାରିଟାନ୍ଟୁ ମଧ୍ୟ ପୁରସ୍କୃତ କରାଯାଇଥିଲା । ରାଜ୍ୟସ୍ତରୀୟ ଚିତ୍ରାଙ୍କନ ପ୍ରତିଯୋଗୀତାରେ ପ୍ରଥମ ସ୍ଥାନ ହାସଲ କରିଥିବା ଅନୁଗୋଳ କେନ୍ଦ୍ରୀୟ ବିଦ୍ୟାଳୟର ଓଁ ସତ୍ୟମ ପଣ୍ଡାଙ୍କୁ ସମ୍ବର୍ଦ୍ଧିତ କରାଯାଇଥିଲା ।