ରାବ୍ଡ଼ୀ ଦେବୀ ଓ ତେଜସ୍ବୀଙ୍କ ‘ଇଫ୍ତାର୍ ପାର୍ଟି’ରେ ଯୋଗ ଦେଲେ ନୀତୀଶ କୁମାର
ପାଟନା: ‘ବିହାର ମହାଗଠବନ୍ଧନ’ର ଅନ୍ୟ ନେତାମାନଙ୍କ ସହିତ ମିଶି ମୁଖ୍ୟମନ୍ତ୍ରୀ ନୀତୀଶ କୁମାର ରବିବାର ଦିନ ରାବ୍ଡୀ ଦେବୀ ଓ ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବଙ୍କଦ୍ବାରା ଆୟୋଜିତ ‘ଇଫ୍ତାର୍ ପାର୍ଟି’ରେ ଯୋଗ ଦେଇଥିଲେ।
ନିଜ ବାସଭବନରେ ଆୟୋଜିତ ଏହି ‘ଇଫ୍ତାର୍ ପାର୍ଟି’କୁ ଆମନ୍ତ୍ରିତ ସମସ୍ତ ଅତିଥିଙ୍କୁ ଉପମୁଖ୍ୟମନ୍ତ୍ରୀ ତେଜସ୍ବୀ ବ୍ୟକ୍ତିଗତ ଭାବେ ଆପ୍ୟାୟିତ କରିଥିଲେ। ମୁଖ୍ୟମନ୍ତ୍ରୀ ନୀତୀଶଙ୍କ ସମେତ ଏହି ‘ଇଫ୍ତାର୍ ପାର୍ଟି’କୁ ଆସିଥିବା ଅନ୍ୟାନ୍ୟ ବିଶିଷ୍ଟ ବ୍ୟକ୍ତିଙ୍କ ମଧ୍ୟରେ ଥିଲେ ପୂର୍ବତନ ମୁଖ୍ୟମନ୍ତ୍ରୀ ଜିତନ ରାମ ମାନ୍ଝି, ‘ଜନ ଅଧିକାର ପାର୍ଟି’ର ମୁଖ୍ୟ ପପ୍ପୁ ଯାଦବ ଏବଂ ‘ଜନତା ଦଳ ୟୁନାଇଟେଡ୍’ର ଜାତୀୟ ଅଧ୍ୟକ୍ଷ ଲାଲନ୍ ସିଂହ।
କୌତୂହଳର କଥା ଯେ, ଶୁକ୍ରବାର ଦିନ ମୁଖ୍ୟମନ୍ତ୍ରୀ ନୀତିଶ କୁମାର ଆୟୋଜନ କରିଥିବା ‘ଇଫ୍ତାର୍ ପାର୍ଟି’ରେ ଯୋଗ ଦେଇ ନ ଥିବା ‘ଲୋକ ଜନଶକ୍ତି ପାର୍ଟି’ର (ଆର୍) ମୁଖ୍ୟ ଚିରାଗ ପାସ୍ୱାନ୍ ରାବ୍ଡ଼ୀ ଦେବୀଙ୍କ ‘ଇଫ୍ତାର୍ ପାର୍ଟି’କୁ ଆସି ନୀତୀଶ କୁମାରଙ୍କ ଚରଣ ସ୍ପର୍ଶ କରିଥିଲେ।
