ଚୋରି ଘଟଣାର ପର୍ଦ୍ଦାଫାଶ : ୧୦ଟି ବାଇକ ଜବତ, ୩ ଗିରଫ

ସମ୍ବଲପୁର ୦୧।୦୨: ବାଇକ୍ ଚୋରି ଘଟଣାର ପର୍ଦ୍ଦାଫାଶ କଲା ବୁର୍ଲା ପୋଲିସ । ବୁର୍ଲା ପୋଲିସ ୧୦ଟି ବାଇକ ଜବତ କରିବା ସହ ୩ଜଣଙ୍କୁ ଗିରଫ କରିଛି । ଏନେଇ ସୂଚନା ଦେଇଛନ୍ତି ସମ୍ବଲପୁର ଏସପି ବତୁଲା ଗଙ୍ଗାଧର । ସେହିପରି ଗିରଫ ଅଭିଯୁକ୍ତମାନେ ହେଲେ ବୌଦ୍ଧ ଜିଲ୍ଲାର ବିକାଶ ବସ୍ତିଆ, ପ୍ରିତମ ସାହୁ ଓ ଆଶିଷ ପ୍ରଧାନ । ଏମାନଙ୍କଠାରୁ ୩ଟି ମୋବାଇଲ ଫୋନ ମଧ୍ୟ ଜବତ ହୋଇଛି । ବାଇକ ସବୁ ସମ୍ବଲପୁର ଜିଲ୍ଲାରୁ ଚୋରି କରି କନ୍ଧମାଳ ଓ ବୌଦ୍ଧ ଜିଲ୍ଲାରେ ବିକ୍ରି କରୁଥିଲେ । କତରବଗାର ଗିରିଧାରୀ ନାଗ ଭୀମସାର ଆସିବା ସହ ବାହାରେ ବାଇକ ରଖିଥିଲେ । ଭୀମସାରରୁ ଫେରିବା ପରେ ବାଇକ ନଥିବାରୁ ଚୋରି ହୋଇଥିବା ନେଇ ବୁର୍ଲା ପୋଲିସର ଦ୍ବାରସ୍ଥ ହୋଇଥିଲେ । ପୋଲିସ ସିସିଟିଭି ଓ ଅନ୍ୟ ସର୍ଭିଲାନ୍ସ ଆଧାରରେ ଏହି ଗ୍ୟାଙ୍ଗକୁ ଧରିବାରେ ସଫଳ ହୋଇଛି ।