ଗୟଳ ଆକ୍ରମଣରେ ୨ ଗୁରୁତର
ଆନନ୍ଦପୁର ୦୩।୦୪ : ଗୟଳ ଆକ୍ରମଣରେ ୨ ଗୁରୁତର। କରଞ୍ଜିଆ ରାସ୍ତାର ପଦ୍ମପୁର ଛକ ନିକଟରେ ଗୟଳ ଆକ୍ରମଣରେ ଦୁଇ ଜଣ ଗୁରୁତର ହୋଇଛନ୍ତି । ସେମାନଙ୍କୁ ଗୁରୁତର ଅବସ୍ଥାରେ ଆନନ୍ଦପୁର ଡାକ୍ତରଖାନାରେ ଭର୍ତ୍ତି କରାଯାଇଛି।
ଖବର ଅନୁଯାୟୀ, ରବିବାର ସକାଳୁ ପଦ୍ମପୁର ଗାଁର ଚିନ୍ତାମଣି ସାହୁ ଓ ଧର ବେହେରା ବଜାରରୁ ନିଜ ଘରକୁ ଫେରୁଥିଲେ । ଠିକ ଏହି ସମୟରେ ପଦ୍ମପୁର ଛକ ନିକଟରେ ଅଚାନକ ୨ଟି ଜଙ୍ଗଲୀ ଗୟଳ ଆକ୍ରମଣ କରିଥିଲେ। ଉଭୟଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଆନନ୍ଦପୁର ମେଡ଼ିକାଲରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ କଟକ ସ୍ଥାନାନ୍ତର କରାଯାଇଛି। ଘଟଣା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି।
ତେବେ ଶନିବାର ସନ୍ଧ୍ୟାରୁ ଗାଁ ନିକଟରେ ଏହି ଗୟଳ ଦୁଇଟି ଥିବା ବେଳେ ଗ୍ରାମବାସୀଙ୍କ ଠାରୁ ଖବର ପାଇ ବନ ବିଭାଗ ସେମାନଙ୍କୁ ଘଉଡାଇବାକୁ ଚେଷ୍ଟା କରିଥିଲା। ହେଲେ ସେମାନେ ଜଙ୍ଗଲକୁ ନଯାଇ ଗାଁର ଅନ୍ୟ ଏକ ପାର୍ଶ୍ୱରେ ଲୁଚି ରହିଥିଲେ। ରବିବାରର ଘଟଣାକୁ ଗୁରୁତ୍ୱର ସହ ନେଇ ତୁରନ୍ତ ଘଉଡାଇବାକୁ ଗ୍ରାମବାସୀମାନେ ଦାବି କରିଛନ୍ତି।
