ଉଦ୍ଧାର ହେଲା ବିରଳ ଧଳା କଇଁଛ

କେନ୍ଦ୍ରାପଡ଼ା: କେନ୍ଦ୍ରାପଡ଼ା ବ୍ଲକ ଅନ୍ତର୍ଗତ ଆୟବା ପଞ୍ଚାୟତରେ ଏକ ବିରଳ ପ୍ରଜାତିର ଧଳା କଇଁଛ ଉଦ୍ଧାର କରାଯାଇଛି । ଗୁରୁବାର ଭୋର୍ ୫ଟା ସମୟରେ ଆୟବା ଗ୍ରାମର ପ୍ରସନ୍ନଜିତ ଦାସ ଓ ସାରଦା ପ୍ରସନ୍ନ ଦାସ ପ୍ରାତଃଭ୍ରମଣ କରୁଥିବା ବେଳେ ଏକ ଧଳା କଇଁଛଟି ରାସ୍ତା ଉପରେ ଯାଉଥିବା ଦେଖି ଉଦ୍ଧାର କରିଥିଲେ । ଏହା ଏକ ବିରଳ ପ୍ରଜାତିର ଧଳା କଇଁଛ ହୋଇଥିବାରୁ ଲୋକମାନେ ଦେଖିବା ପାଇଁ ପ୍ରବଳ ଭିଡ଼ ଜମାଇଥିଲେ । ଇତିମଧ୍ୟରେ କଇଁଛଟିକୁ ବନ ବିଭାଗକୁ ହସ୍ତାନ୍ତର କରାଯାଇଛି । ଏ ସମ୍ପର୍କରେ ରେଞ୍ଜର ମାନସ ରଞ୍ଜନ ଦାସ କହିଛନ୍ତି ଏହା ଅଲବିନୋ ପ୍ରଜାତିର କଇଁଛ । ସାଧାରଣତଃ ଏହା ମଧୁର ଜଳରେ ବାସ କରେ । ଏହି ପ୍ରଜାତିର କଇଁଛ ଭାରତବର୍ଷରେ ଦକ୍ଷିଣାଞ୍ଚଳର ତେଲେଙ୍ଗାନା ଏବଂ ଶ୍ରୀଲଙ୍କା ଓ କ୍ୱାଲାଲାମପୁରରେ ଦେଖିବାକୁ ମିଳିଥାଏ ।