ଯଶୱନ୍ତ ସିହ୍ନା ରାଷ୍ଟ୍ରପତି ପ୍ରାର୍ଥୀ
ନୂଆଦିଲ୍ଲୀ : ରାଷ୍ଟ୍ରପତି ନିର୍ବାଚନକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି । ପୂର୍ବତନ କେନ୍ଦ୍ରମନ୍ତ୍ରୀ ତଥା ବରିଷ୍ଠ ରାଜନେତା ଯଶୱନ୍ତ ସିହ୍ନାଙ୍କୁ ମିଳିତ ବିରୋଧୀ ଦଳ ପକ୍ଷରୁ ରାଷ୍ଟ୍ରପତି ପ୍ରାର୍ଥୀ ଭାବେ ଘୋଷଣା କରାଯାଇଛି ।
ବରିଷ୍ଠ କଂଗ୍ରେସ ନେତା ମଲ୍ଲିକାର୍ଜୁନ ଖାଡ଼ଗେ ରାଷ୍ଟ୍ରପତି ପ୍ରାର୍ଥୀ ଭାବେ ଯଶୱନ୍ତଙ୍କ ନାମ ଘୋଷଣା କରିଛନ୍ତି । ତୃଣମୂଳ କଂଗ୍ରେସରୁ ଇସ୍ତଫା ଦେବାର କିଛି ସମୟ ପରେ ତାଙ୍କୁ ରାଷ୍ଟ୍ରପତି ପ୍ରାର୍ଥୀ କରାଯାଇଛି । ତାଙ୍କ ନାମ ଘୋଷଣା ବେଳେ ଏନସିପି ସୁପ୍ରିମୋ ଶରଦ ପାୱାର ମଧ୍ୟ ଉପସ୍ଥିତ ଥିଲେ ।
ସୂଚନାଯୋଗ୍ୟଯେ, ବିରୋଧୀ ଦଳ ମିଳିତ ଭାବେ ଲଢେ଼ଇ କରିବାକୁ ନିଷ୍ପତି ନେଇଛନ୍ତି । ପୂର୍ବରୁ ଶରଦ ପାୱାର, ମହାତ୍ମାଗାନ୍ଧୀଙ୍କ ନାତି ଗୋପାଳକୃଷ୍ଣ ଗାନ୍ଧୀ ଓ ନାସନାଲ କନଫେରେନ୍ସ ମୁଖ୍ୟ ଫାରୁକ ଅବଦୁଲ୍ଲାଙ୍କୁ ପ୍ରାର୍ଥୀ କରିବା ପାଇଁ ଯୋଜନା ଚାଲିଥିବାବେଳେ ସେମାନେ ମନା କରି ଦେଇଥିଲେ ।
ଏକଦା ଯଶୱନ୍ତ ସିହ୍ନା ବିଜେପିର ଆଗଧାଡ଼ିର ନେତା ଥିଲେ । ଚନ୍ଦ୍ରଶେଖର ଓ ବାଜପେୟୀଙ୍କ ଅମଳରେ ସେ ମନ୍ତ୍ରୀ ମଧ୍ୟ ଥିଲେ । ତେବେ ନରେନ୍ଦ୍ର ମୋଦି ଓ ଅମିତ ଶାହାଙ୍କ ସହ ତାଙ୍କର ସୁସମ୍ପର୍କ ନଥିବାରୁ ସେ ୨୦୧୮ରେ ବିଜେପି ଛାଡ଼ି ଥିଲେ । ପରେ ଗତବର୍ଷ ସେ ତୃଣମୂଳ କଂଗ୍ରେସରେ ଯୋଗଦେଇଥିଲେ ।
