ବିଶିଷ୍ଟ ଅର୍ଥନୀତି ବିଶାରଦ ତଥା ସ୍ତମ୍ଭକାର ଓମ୍ ପ୍ରକାଶ ଜଗତି ଆଉ ନାହାନ୍ତି
କଟକ: ବିଶିଷ୍ଟ ଅର୍ଥନୀତି ବିଶାରଦ ଓମ୍ ପ୍ରକାଶ ଜଗତିଙ୍କର କଟକର ଏକ ଘରୋଇ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ପରଲୋକ ହୋଇଛି। ସେ ‘ସମ୍ବାଦ’ର ବଜାର ହାଲଚାଲ୍ ସମ୍ଭର ଲେଖକ ଭାବେ ବେଶ ପରିଚିତ। କଟକରେ ଜନ୍ମିତ ଓମ୍ ପ୍ରକାଶ ଜଗତି ଜଣାଶୁଣା ଆଇନଜୀବୀ ଯଦୁନାଥ ଜଗତିଙ୍କ ଏକମାତ୍ର ପୁତ୍ର। ସେ କଟକର ରେଭନେସା କଲିଜିଏଏଟ୍ ସ୍କୁଲର ଜଣେ ପ୍ରାକ୍ତନ ଛାତ୍ର।
ସମ୍ମାନଜନକ ଇଂରାଜୀ କର୍ପୋରେଟ୍ ପତ୍ରିକା ‘ସିଏଫ୍ଓ-ଇଣ୍ଡିଆ’ ତରଫରୁ ‘ସମ୍ବାଦ’ର ବଜାର ହାଲ୍ଚାଲ୍ ସମ୍ଭର ଲେଖକ ଓମ୍ ପ୍ରକାଶ ଜଗତିଙ୍କୁ ୨୦୧୬-୧୭ ଆର୍ଥିକ ବର୍ଷ ପାଇଁ ସିଏଫ୍ଓ ଆଓ୍ଵାର୍ଡରେ ସମ୍ମାନିତ କରାଯାଇଥିଲା। ମ୍ୟାନେଜମେଣ୍ଟ ଏଣ୍ଡ କଣ୍ଟ୍ରୋଲ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ତାଙ୍କୁ ଏହି ପୁରସ୍କାର ମିଳିଥିଲା। ଗତ ୧୬ ତାରିଖ ଦିନ ମୁମ୍ବାଇର ଲୀଲା ହୋଟେଲରେ ସେବିର ପୂର୍ବତନ ଅଧ୍ୟକ୍ଷ ଏମ୍. ଦାମୋଦରନ୍ ଏହି ପୁରସ୍କାର ପ୍ରଦାନ କରିଥିଲେ। ଚାର୍ଟାର୍ଡ ଆକାଉଣ୍ଟାଣ୍ଟ୍ ଶ୍ରୀ ଜଗତି ସଂପ୍ରତି ବେଙ୍ଗାଲୁରୁସ୍ଥିତ ବହୁଦେଶୀୟ କଂପାନି ଫାଉଲର୍ ଓ୍ଵସ୍ଟ୍ରୁପ୍ରେ ସିନିୟର ଭାଇସ୍ ପ୍ରେସିଡେଣ୍ଟ୍ ପଦରେ କାର୍ଯ୍ୟରତ ଥିଲେ। ଓମ୍ ପ୍ରକାଶ ଜଗତିଙ୍କ ବିୟୋଗରେ ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି।
