ପ୍ରଧାନମନ୍ତ୍ରୀ ଦେଶବ୍ୟାପୀ ଚାଷୀଙ୍କ ସହ ଆସନ୍ତାକାଲି କରିବେ ଆଲୋଚନା

ଭୁବନେଶ୍ୱର ୧୯/୬:ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ସିଧାସଳଖ ଭିଡିଓ ବ୍ରିଜ କାର୍ୟ୍ୟକ୍ରମ ଜରିଆରେ ସାରାଦେଶର ଚାଷୀଙ୍କ ସହ ଆଲୋଚନା କରିବେ । ସକାଳ ୦୯.୩୦ ମିନିଟ ସମୟରେ ଏହି ଭିଡିଓ ବ୍ରିଜ କାର୍ୟ୍ୟକ୍ରମ ଅନୁଷ୍ଠିତ ହେବ ଏବଂ ଏହାକୁ ସିଧାସଳଖ ଦୂରଦର୍ଶନ ମାଧ୍ୟମରେ ପ୍ରସାରଣ କରାଯିବ । ଏହାଛଡା ଡିଡି କିଷାନ ଏବଂ ଆକାଶବାଣୀ ମାଧ୍ୟମରେ ମଧ୍ୟ ଏହି ମତ ବିନିମୟ କାର୍ୟ୍ୟକ୍ରମ ସିଧାସଳଖ ପ୍ରସାରଣ କରାଯିବ । ପ୍ରଧାନମନ୍ତ୍ରୀ ଶ୍ରୀ ମୋଦୀ ଚାଷୀମାନଙ୍କଠାରୁ ସେମାନଙ୍କର ମତ, ସମସ୍ୟା ଓ ପ୍ରସ୍ତାବ ସମ୍ପର୍କରେ ମନ ଦେଇ ଶୁଣିବେ । ମତ ବିନିମୟ କାଳରେ ଚାଷୀଙ୍କ ଆୟ କିଭଳି ଦୁଇଗୁଣ କରାଯାଇପାରିବ ସେଥିନେଇ ମଧ୍ୟ ପ୍ରତ୍ୟକ୍ଷ ବିଚାର ବିମର୍ଶ ହେବ । କୃଷକମାନେ ମୁକ୍ତ ମନରେ ପ୍ରଧାନମନ୍ତ୍ରୀଙ୍କ ଆଗରେ ନିଜର ଭାବନା ଉପସ୍ଥାପନ କରିବେ । ଏଥିଲାଗି କୃଷି ବିଜ୍ଞାନ କେନ୍ଦ୍ର, ସାଧାରଣ ସେବା କେନ୍ଦ୍ର ଆଦି ସ୍ଥାନରେ ଚାଷୀମାନେ ଉପସ୍ଥିତ ରହି ପ୍ରଧାନମନ୍ତ୍ରୀଙ୍କ ସହ ମତ ବିନିମୟ କରିବେ । ଏହାଛଡା “ନରେନ୍ଦ୍ର ମୋଦୀ ଆପ୍” ଜରିଆରେ ମଧ୍ୟ ଜନସାଧାରଣ ମତ ବିନିମୟ କାର୍ୟ୍ୟକ୍ରମରେ ଅଂଶଗ୍ରହଣ କରିପାରିବେ ।