ଛୁରାମାଡରେ ଯୁବକ ମୃତ

ଚମ୍ପୁଆ : ଦିନକୁ ଦିନ ହଜିଯାଉଛି ମାନବିକତା । ସାମାନ୍ୟ ରାଗର ବଶବର୍ତ୍ତୀ ମଣିଷ ନିମିଷକ ମଧ୍ୟରେ ଘଟାଉଛି ଅଭାବନୀୟ କାଣ୍ଡ । ଯେଉଥିପାଇଁ ତାକୁ ବହୁ ମୂଲ୍ୟ ଦେବାକୁ ପଡୁଛି ଓ ଅକାଳରେ ଚାଲିଯାଉଛି ଅମୂଲ୍ୟ ଜୀବନ । ଆଜି ଛୁରାମାଡରେ ଜଣେ ଯୁବକଙ୍କ ମୃତୁ୍ୟ ହୋଇଛି । ଏଭଳି ଘଟଣା ଦେଖିବାକୁ ମିଳିଛି ଯୋଡା ସହର ଗଣେଶ ଭବନ ନିକଟରେ । ସୂଚନା ଅନୁସାରେ ଗତକାଲି ବିଳମ୍ବିତ ରାତିରେ ଏହି ଛୁରାମାଡ ହୋଇଛି । ଏହି ଛୁରାମାଡରେ ପ୍ରାଣ ହରାଇଥିବା ଯୁବକ ଜଣଙ୍କ ପଶ୍ଚିମବଙ୍ଗ ମୁର୍ଶିଦାବାଦର ହୋଇଥିବା ଜଣାପଡିଛି । ସାମାନ୍ୟ ବଚସାରୁ ଏହି ଛୁରାମାଡ ହୋଇଥିବା ସୂଚନା ମିଳିଛି । କିନ୍ତୁ କାହିଁକି ବଚସା ହୋଇଥିଲା, ତା’ର କାରଣ ଏଯାଏ ସ୍ପଷ୍ଟ ଜଣାପଡିନାହିଁ । ପୋଲିସ୍ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଜାରି ରଖିଛି ।