ଇରାକ ପ୍ରଧାନମନ୍ତ୍ରୀଙ୍କୁ ହତ୍ୟା ଉଦ୍ୟମ

ବାଗଦାଦ: ଇରାକ ପ୍ରଧାନମନ୍ତ୍ରୀଙ୍କୁ ହତ୍ୟା ଉଦ୍ୟମ । ପ୍ରଧାନମନ୍ତ୍ରୀ ମୁସ୍ତାଫା ଅଲ୍-କଧିମିଙ୍କ ବାସଭବନ ଉପରେ ବିସ୍ଫୋରକ ବୋଝେଇ ଡ୍ରୋନ ଆକ୍ରମଣ ହୋଇଛି । ଆକ୍ରମଣ ଯୋଗୁଁ ପିଏମଙ୍କ କୌଣସି କ୍ଷତି ହୋଇନାହିଁ । ମାତ୍ର ଏଥିରେ ତାଙ୍କର ସାତ ଜଣ ସିକ୍ୟୁରିଟି ଗାର୍ଡ ଆହତ ହୋଇଛନ୍ତି । ଆଜି ସକାଳେ ଏହି ଆକ୍ରମଣ ଘଟିଛି । ଏକ ବିବୃତ୍ତି ଜରିଆରେ ଇରାକ ପକ୍ଷରୁ ଏହି ସୂଚନା ଦିଆଯାଇଛି । ଏନେଇ ଇରାକ୍ ପ୍ରଧାନମନ୍ତ୍ରୀ ଟ୍ବିଟ୍ କରିଛନ୍ତି, 'ମୁଁ ମୋର ଲୋକଙ୍କ ସହ ସୁରକ୍ଷିତ ଅଛି । ଭଗବାନଙ୍କୁ ଧନ୍ୟବାଦ' । ଏଥିସହ ସେ ଲୋକଙ୍କୁ ଶାନ୍ତି ବଜାୟ ରଖିବାକୁ କହିଛନ୍ତି । ଏହି ଆକ୍ରମଣ ଘଟଣାକୁ ଆମେରିକା ଦୃଢ ନିନ୍ଦା କରିଛି ଏବଂ ଏହା ପଛରେ ଆତଙ୍କୀ ସଙ୍ଗଠନର ହାତ ଥିବା ସନ୍ଦେହ କରିଛି । ସେପଟେ ଏହି ଆକ୍ରମଣ ପରେ ବାଗଦାଦ ସ୍ଥିତ ପ୍ରଧାନମନ୍ତ୍ରୀଙ୍କ ବାସଭବନ ଥିବା ଗ୍ରୀନ ଜୋନରେ ସୁରକ୍ଷା ବ୍ୟବସ୍ଥାକୁ ବଢାଇ ଦିଆଯାଇଛି ।